O artigo 149.1.9 da Constitución Española establece que lle corresponde ao Estado a competencia exclusiva en materia de lexislación sobre propiedade industrial e intelectual. Por outra banda, o Estatuto de Autonomía de Galicia no seu artigo 29 outorga á Comunidade Autónoma Galega a competencia de execución da lexislación do Estado en materia de propiedade industrial.

Tendo isto en conta, a Xunta de Galicia e a Oficina Española de Patentes e Marcas (OEPM) subscribiron un convenio de colaboración que se renova automaticamente cada ano en virtude do cal o Servizo Galego da Propiedade Industrial (Segapi) prestará os servizos de oficina rexional da OEPM como oficina receptora de solicitudes e outros documentos relacionados coa concesión de títulos de propiedade industrial, de prestación de servizos de información e como impulsora da protección e utilización do sistema de propiedade industrial por parte do tecido empresarial galego.

• Como consecuencia do anterior, a Dirección de Estratexia Industrial e Solo Empresarial, a través do Segapi, é unha dirección xeral socio colaborador da OEPM e recoñecida tamén pola Oficina Europea de Patentes, como parte do PATLIB, así como pola Organización Mundial da Propiedade Industrial (OMPI).
• Estes servizos ofrecen atención persoal (con cita previa solicitada por correo electrónico) ou directamente a través do enderezo electrónico de consulta: infosegapi.industria@xunta.gal

Dependencia funcional: o Segapi é unha unidade da Dirección Xeral de Estratexia Industrial e Solo Empresarial dentro do Servizo de Administración Industrial (SegapI) dependente da Subdirección Xeral de Administración e Seguridade Industrial.